HomeLajmeLajme nga ShqiperiaTragjedia në Himarë, Rama: Uroj që drejtësia t’i japë ndëshkimin më ekstrem fajtorit

Tragjedia në Himarë, Rama: Uroj që drejtësia t’i japë ndëshkimin më ekstrem fajtorit

 Kryeministri Edi Rama ka reaguar sërish në lidhje me vrasjen e 7-vjeçares në plazhin e Potamit nga një punonjës Policie.

Në një shkrim në Twitter, Rama ka thënë se tragjedia e djeshme i ka tronditur të gjithë dhe ka krijuar një ndjenjë të rëndë shqetësimi.

“Tragjedia e djeshme ka tronditur të madh e të vogël dhe ka krijuar një ndjenjë të rëndë shqetësimi, ndërkohë që Policia e Shtetit po merr të gjitha masat për të reaguar shumë më fort ndaj sfidës së garantimit të rendit ligjor jo vetëm në qarkullimin rrugor, po edhe atë ujor”, tha ai.

Rama ka theksuar se Policia e Shtetit po merr të gjitha masat për të reaguar shumë më fort ndaj sfidës së garantimit të rendit ligjor.

“Shkarkimi i gjithë trupës së drejtorisë së kufirit Vlorë dhe vendosja e një fokusi të shtuar mbi qarkullimin ujor, janë hapat e duhur që do të pasohen nga hapa të tjerë, në kushtet kur rritja e përvitshme e numrit të mjeteve lundruese përbën një sfidë të vazhdueshme për të gjithë”, deklaroi kreu i ekzekutivit.

Po ashtu, Rama ka kërkuar ndëshkim ekstrem për fajtorin e tragjedisë.

“Uroj edhe njëherë që drejtësia t’i japë ndëshkimin më ekstrem fajtorit për këtë tragjedi!”

Kryeministri nuk shmang edhe elementin partiak të kësaj tragjedie duke fajësuar “non gratat” për përdorim politik të ngjarjes.

“Sa për çetat e udhëhequra nga non gratat dhe nga ata me identitet të dyfishtë që kërkojnë ta kthejnë këtë vdekje tragjike në motiv lufte politike, kjo s’është as e para as e fundit herë kur një fatkeqësi që trondit shoqërinë, ekspozon shëmtinë e pacipë të shpirtit të tyre”, shkroi kryeministri

Megjithatë, Rama thotë se ky është sezoni më i organizuar, më i rregullt e më i pastër turistik ndonjëherë.

“Ishte deri dje edhe sezoni më i qetë e më i sigurtë, me plazhet publike dhe rrjetin e vrojtuesve të plazhit organizuar si asnjëherë tjetër”.

“Vizioni i Shqipërisë turistike dhe ambicia që kjo të jetë dekada e kthimit të vendit tonë në kampionin rajonal të turizmit, lidhet edhe me rritjen e lartë të mjeteve lundruese dhe sfidën e disiplinimit të tyre, që nuk është një fjalë goje në një vend ku deri dje ato s’ekzistonin”, shkroi Rama./Telegrafi.




Huazuar nga

No comments

Sorry, the comment form is closed at this time.