Për debatin rreth ndalimit të shamisë në shkollën e Gjakovës, Haradinaj: Mos të biem në gracka të panevojshme

45


Kryetari i Aleancës për Ardhmërinë e Kosovës (AAK), Ramush Haradinaj, gjatë vizitës së sotme në Prizren, ka qëndruar edhe në Këshillin e Bashkësisë Islame në Prizren.

Me këtë rast Haradinaj uroi për muajin e shenjtë të Ramazanit të gjithë besimtarët myslimanë.

“Sot jam duke qëndruar në Prizren në vendin e vlerave ndërfetare. Tani jam në selinë e Bashkësisë Islame në Prizren, ku nga këtu ju uroj muajin e shenjtë të Ramazanit të gjithë besimtarëve mysliman. Uroj që të keni agjërim të lehtë dhe Zoti të ju pranon agjërimin”, tha mes tjerash Haradinaj.

Haradinaj po ashtu ka reaguar për debatin që nisi ditën e djeshme, që ndodhi në një shkollë në Gjakovë, rreth vendosjes së shenjës se ndalohet shamia, duke e konsideruar vendosjen e shenjave të tilla si të panevojshme.

“Dua të dërgoj edhe një porosi. Ne jemi një. Jemi një familje. Një komb. Një vlerë, nuk ndahemi. Kur them nuk ndahemi, do të dimë mos me ra në gracka dhe debate të panevojshme. Ju e patë se si ndodhi një debat për simbolet dhe gjërat e lejuara apo të palejuara në shkolla. Të ju them të drejtën ajo shenjë ishte e panevojshme në një shkollë”.

“Është e vërtetë se ekziston një udhëzim administrativ [që ndalon shamitë në shkolla]. Ajo çështje do të duhej të trajtohet në kanalet e veta zyrtare dhe administrative, pra në vijën institucionale. Po jo të nxisim debate që se kanë kohën edhe vendin dhe të lëndojmë ndjenjat e ndërsjella”, tha Haradinaj.

Kreu i AAK-së vizitën në Prizren e ka nisur me takimin me të parin e këtij qyteti Shaqir Totaj, si dhe ka vizituar veteranen e arsimit, mësuesen Mejreme Berisha Gashi.

Vizitën në Prizren, Haradinaj e ka përmbyllur me takimin me udhëheqjen e Aleancës në këtë qytet./Telegrafi/





Huazuar nga