14:01, 21 Maj 2020

Deputeti i Aleancës për Ardhmërinë e Kosovës, Gazmend Syla, ka kërkuar nga qeveria që në planin e hapjes së ekonomisë e institucioneve, të përfshihet edhe hapja e objekteve fetare.

Syla ka thënë se festa e Bajramit që do të festohet të dielën, duhet të falet aty ku është vendi, njofton Klan Kosova.

Deputeti ka propozuar që xhamitë të hapen duke respektuar rekomandimet e IKSHPK-së, ndërkohë që ka propozuar që për faljen e Bajramit të shfrytëzohen edhe kishat.

“Plani i hapjes duhet të ndryshojë dhe duhet të përfshijë edhe hapjen e objekteve fetare sa më parë. Festa e Bajramit duhet të falet aty ku e ka vendin: në objekte fetare me kujdes e rregulla për shkak të pandemisë. Në këtë kuptim, edhe kishat katolike mund të shfrytëzohen. Vëllëzërit tonë katolikë nuk kanë as edhe një problem me këtë”.

Syla ka thënë se Kosova e ka dëshmuar përgjatë historisë harmoninë fetare, prandaj edhe kjo ide mund të aplikohet.

“Në Kosovë është dëshmuar historikisht se ka harmoni fetare. Është koha ta dëshmojmë edhe tash, pavarësisht standardeve të dyfishta të Qeverisë në ikje”.
Një gjë e tillë kishte ndodhur dje në një kishë në Gjermani ku disa besimtarë myslimanë ishin falur për shkak të hapësirës më të madhe.





Source link