Rrjeti shtetëror britanik BBC ka kërkuar ndjesë, pasi lexuesja e vjetër e lajmeve Fiona Bruce pretendoi se punëtorët ‘e pakualifikuar’ janë më të rrezikuar të preken nga koronavirusi.

Duke komentuar mbi lajmet për vdekshmërinë e koronavirusit, Bruce tha mes të tjerave se “punonjësit më pak të kualifikuar si shoferët e autobuzëve,” janë më të rrezikuar nga sëmundja.

“Njerëzit në vende pune pa kualifikime si rojet e sigurisë, punonjësit e azileve dhe shoferët e autobuzëve, kanë më shumë gjasa të vdesin nga koronavirusi sipas të dhënave të reja”, tha ajo.

Por rrjeti BBC kërkoi ndjesë publike për mënyrën e shprehjes së gazetares. “Ne po raportonim shifrat e Zyrës Kombëtare të Statistikave dhe termi ‘i pakualifikuar’ përdoret prej agjencisë për disa tipe punësh, prandaj dhe u përdor prej nesh”, thanë ata.

Më tej rrjeti shtonte në justifikim: “Ne vlerësojmë shqetësimin se disa përshkrime nuk japin vlerësimin e duhur për punonjës të sektorëve kyçë të ekonomisë dhe tashmë kemi ndryshuar mënyrën e përshkrimit të tyre. Ne nuk kishim qëllim të shkaktonim ofendim dhe na vjen keq që disa shikues e konsideruan si të tillë”.

Zhvillimi vjen pasi kryeministri Boris Johnson tha më herët se ata që nuk punojnë dot nga shtëpia – siç janë shoferët e autobuzëve apo punëtorët e ndërtimit – duhet të kthehen në punë.

Johnson tha se ata duhet ta bënin këtë duke ecur, ose duke përdorur makinë ose biçikletë, dhe se duhet të evitonin transportin publik.


Top Channel





Source link